راجعه اكيد

أمجادك يا بلدي مهما عملوا راجعه تاني من جديد

واحنا ولادك يا مصر فداكي ولو حتي راح مليون شهيد

قالوا فضل اللي انتي فيه منهم..قلت مصر ما ليها سيد

قالوا مصر ديه لولا همَّا كان مكانها يكون بعيد

يمكن يا بلدي يكون غفلتي وساد عليكي البليد

مصر هيَّ الأم هيَّ مصر داينه للرعيه مصر داينه بألف إيد

مصر كاتبه تاريخها بيها مصر يومها كله عيد

مصر دافنه اللي خانوها مصر قاهره للعبيد

مصر..انتي فين

الدنيا برد وعاوز أدفي وفين ألاقي حضنك يا مصر
تُهت منّا خدوكي منّا حبسوكي جوه كل قصر
جمعوا الولايم بسطوا العزايم ومصمصوكي وقالوا نصر
بتطلي من جوه الحديد الحر أصبح كالعبيد ما دول ولادك في كل عصر

مش همهم إنك تموتي مش فكرهم كونك عزيزه
كل واحد مننّا بقي يتمني البريزه
لو حد م الناس الكبار يرمي البريزه جوه نار
نجيبها وتموت العزيزه ونحي احنا بالبريزه

هدومنا دابت وصوتنا راح وفي قلوبنا فتحوا الجراح
يا مصر سامعك بتقولي اااااه ولا شيء بإيدنا ولا شيء متاح
صبح اللّي سرقك أكبر مجاهد مشهود له دايما بالصلاح
وإحنا ولادك سيبناكي ليهم سلمنا بدري وصبحتي انتي سداح مداح

مش همنا إنك تموتي مش فكرنا كونك عزيزه
كل واحد مننّا بقي يتمني البريزه
لو حد م الناس الكبار يرمي البريزه جوه نار
نجيبها وتموت العزيزه ونحي احنا بالبريزه

شايفينك ياللي بعت بلدي وكأنها عزبة أبوك
عارفينك ماكنش جيبك بالتقل دا لمّا جم ومسٍّكوك
الفرصه احنا اللي اديناها وإن يوم صحينا يومها بس هتعتبر م اللي فاتوك
ها تقول حرام ما كنت عارف ولا حتي شايف. ليه بقي؟؟؟ كنت عاجز ولا مطنّش جاي تدوّر ع اللي خانوك

بس يا مصر دا حلم جامد واحنا زي ما كنّا احنا أملنا في اللقمه واللحمه

مش همنا إنك تموتي مش فكرنا كونك عزيزه
كل واحد مننّا بقي يتمني البريزه
لو حد م الناس الكبار يرمي البريزه جوه نار
نجيبها وتموت العزيزه ونحي احنا بالبريزه

اديني بقول

نفسي أقولها لازم أقولها طيب قول لا لا لا مش معقول
واحد زيي شارب الفول
لما يبص لفووووق أوي يتعب..لما يبص لتحت يهيس
ماشي جنب الحيط يا ساده ..عمّال يرطن لحن سعاده
وإن جاله جفاف اديله محلول..وإن جاله جفاف اديله محلول
وحتي المحلول مش لاقينه والبهوات شايلين محمول
كلّ منهم عمال يشحن اشي ميايه واشي حركات
والميات ورا الميات
كل واحد عامل نفسه ولا أحسن أحسن مسئول
وإن جه يوم وناديته سعادتك بينفض يعمل مشغول
ما أنا قلت الاول يا ساده مش راح أنطق مش راح أقول
أصل الواحد يوم ما يلهفت ع السيكو سيكو يروح منقول
ولاّ أقول لازم أقول يعني هأعمل ايه بالفول
أصلي عاملّي دماغ أوي عاليه وإن حد في يوم فيكو فهمني يبقي يقول أصله كلام من مسطول وعشان كده

لازم أقووووووووول

لما يكون اللي بيحكمنا لابس متشيك أنتيكه
راكب ولا أجدع عربيه لازم تبقي علي الفبريكه
عمال يتكلم عن جوعنا وعاوز يمسحنا بأستيكه
عمال يرغي بقولة شعبي كلمه حلاوه كلامه مزيكا
عارف مره يا صاحبي سمعته من ضمن مرات الراديو ولاّ يمكن كان في الفيديو
لما الشعب كان بيشجع بيقول مصر كان هو بيقول أمريكا
وإن يوم حد يقوله منين يهز في ديله يحمر عينه وينادي علي طول مسروووور
اقطع راسه دا بيسأل أسئلته ركيكه

اديني بقول يا ابني روحّ أصله كلام من مسطول ولا أقولك خلاص متزقش لازم أقول

بص يا سيدي قبل ما نحكي سمّي وصلّي علي المختار
هو بياكل لحمه وفته واحنا ياريت لاقين الخيار
هو عنده جنينه في قصره واحنا العيشه في بيتنا مرار
هو بيطلب لازم ياخد ..قصدي قبل ما يطلب ياخد
أصله مغسل ضامن جنه واحنا يا عيني رايحين النار

يعني عشان حبه ملاطيش ومايسوش في السوق تعريفه
يعكر باله يحرق دمه ما هو خيركوا بين ميه موته
يلا اختار يا صاحبي موته يلا انضم لللأحرار
بتبص بعينك ليّا سعادتك لا لا أنا عاجبني الذّل ماشي جنب الحيط ميت فل
يمكن أسمع شيء يفرحني وإن مسمعتش جايز اخد من فوري قرار
إني أمشي جوه الحيط أصل بره الحيط يا صاحبي مش بقي آمن بقي ليل ضلمه
رجعنا نهلفت لا لا دا أحلي نهار
سيبك من كل الحوارات سيبك من كل الشعارات
يلا بينا نمشي نقول تحيا اللحمه مع الملوخيه والفراخ والكوسه عليا
ويموت العدس ابو تقليه
لحمه ايه وفراخ ايه وكمان عدس بالتقليه
يلا ندور علي الخيار